خطأ غير مقصود

خاطره بريئه بسيطه غير مقصوده خطرت على بالى البرئ الطفل المسكين أسرائيل ايوه أسرائيل عادى يعنى

أسرائيل هى الدوله الوحيده فى العالم المقامه على أساس دينى مواطنوها جمعوا من شتى بقاع الارض لايجمعهم سوا انهم يدينون جميعا بالديانه اليهوديه فكروا كده معايا لو حد من العالم الاسلامى فكر يعمل كده ويعمل دوله اساسها ان مواطنيها يدينون بالاسلام عاديك على اللى حيحصل واول المعارضين المنددين حيكونوا عرب مسلمين وستوصف الدوله الناشئه قبل ميلادها بالارهابيه بالرغم ان ماتفعله أسرائيل لاشئ سوى الأرهاب فكر معايا مره تانيه من فضلك لو شويه شباب كده مسلم عربى ولاحتى اجنبى قال ماتيجوا ياجماعه نعمل قانون يجرم الاساءه للأسلام أوعدك انك حيتقال عليك رجعى متخلف عنصرى تضطهد اصحاب الديانات الاخرى ويمكن تغتال مع ان فى قانون قديم جدا فى العالم معترف به مطبق ولا حتى اوباما بجلاله قدره يقدر يقول فيه تلت التلاته كام اسمه قانون معاداه الساميه ولا ايه؟ مجرد خاطره غير مقصوده سلام ولا شالوم اضمن اريح ومش عنصريه ولاارهابيه

عم غريب هو الحل

عزيزى الجالس امام شاشه الكمبيوتر تبكى نتيجه الاستفتاء التى جاءت مخيبه لامالك وامال الطبقه المثقفه بالكامل احب احكيلك حكايه اقولك ليه ده حصل ليه مصر بكامل ارادتها قالت نعم

عم غريب ايوه الاجابه عم غريب اهدى بس وصبرك بالله عليه حافهمك عم غريب عسكرى امن مركزى سابق يبلغ من العمر الان 50 عاما يعمل ساعى باحدى شركات التصدير بمحافظه الاسكندريه يقطن قريه تابعه لمدينه كفر الدوار يوم الجمعه المجيده اللى غار فيها مبارك عم غريب كان مروح بيته وكانت الكهربا مقطوعه عن قريته ومفيش تليفزيون اشتغل فى البلد كلها ونامت القريه ومحدش عرف ايه اللى بيحصل بره حدود القريه حتى عادت الكهرباء ظهر السبت صحى الفجر نزل اسكندريه وكل اللى معاه فى الميكروباص ياعينى من الناس الشاقيانه اللى بتكمل بقيت نومها فى المواصلات فمتكلمش مع حد ووصل الشركه لقى الموظفين مهيصين فرحانيين سألهم فى ايه قالولوه ايه ياعم غريب حسنى مشى قالهم بجد والله ماكنت اعرف
دى مش نكته والله دى حقيقه فى قريه كامله فى مصر لغايه يوم 12 فبراير الظهر ماكانت تعرف ان حسنى مبارك مشى ودى قريه تبعد عن اسكندريه45 دقيقه امال لما نخش فى الغميق فى قرى ياجماعه مدفونه ماتقنعنيش بقى ان الناس دى وهى الغالبيه العظمى من سكان مصر اللى حنسمع صوتهم كتييييييييييييييييييير اوى لان هى دى الاصوات الانتخابيه اللى حنتعامل معها بعد كده متقنعنيش ان الناس دى ماتسمعش كلام الشيخ بتاع المسجد وتسمع كلام بسمه مع كل الاحترام للفنانه بسمه بس دى مش منهم دى بالنسبه لهم جايه من المريخ يمكن يكونوا مش مصدقين ان الناس دى حقيقيه لكن شيخ المسجد وقسيس الكنيسه منهم عارفهم وعارفينه بيثقوا فيه
عشان كده ايها الباكى افيق دى احسن حاجه حصلت فى مصرهدى اخلاقك بس ايوه لعله خير فتحت عنينا على واقع الشارع المصرى على انصار واتباع ومريدى عم غريب عاوز ديمقراطيه فى مصر انزل النجوع و القرى و العزب اتكلم مع الناس مصر مش على الفيس بوك ولاتويتر اللى كهربا بتغيب عنه بالاسبوع هو اللى بيحكم دلوقتى ودى الديمقراطيه
والادهى من كده ان الاخوان اكتر ناس بتعرف تتعامل مع الطبقه دى اللى قاعدين على الفيس يشككوا فى نزاهه الاستفتاء لاتهينوا مصر الاستفتاء صحيح تماما ولكننا مغيبون ممزقون افيقوا عم غريب هو الحل

B+ Episode 3 - باسم يوسف شو (مع عمرو مصطفي) الحلقة ٣

من المستفيد ؟من القاتل؟

اله يتشك فى ودانه ويدوخ دوختنا اللى له مصلحه فى اللى بيحصل ده

حاموت وافهم اللجنه الموقره لتعديل الدستور عدلت 8 مواد لا شائبه فيهم وعداهم العيب والله وأزح طب ليه ماكملوش جميلهم وعدلوا أد تلت اربع مواد كده من الالف وخمسمية ماده اللى بتحدد صلاحيات رئيس الجمهوريه وفاضل تخليه يبقى رئيس مراجيح مولد النبى ياترى لصالح مين هل لصنع ديكتاتور جديد طب هى اللجنه معانا ولا مع الاخوان ولاامريكا ولا الجيش ولا الوطنى ولا معايا ولا انا مع مين ولا هو فى ايه اساسا اللى يعرف من اللى له مصلحه واللى ان شاء الله حيتشك فى ودانه برضه يقولى من المستفيد ؟من القاتل ؟

أسماء والحب

استغرقنى الأمر أكثر من سته سنوات لكى اتمكن من الكتابه عنها أسماء صديقه عزيزه توفاها الله بعد صراع طويل مع مرض السرطان تعلمت منها الكثير والكثير تعلمت الايمان بالقدر تعلمت معنى الصديق الحق والاهم انى تعلمت منها اجمل تعريف للحب يخطر على بال انسان وسأروى لكم القصه واعرف ان اسماء سوف تسامحنى على افشاء سرها فقد كانت تتكتم حياتها العاطفيه جدا

كانت اسماء فى قمه مرضها ولم يكن يعرف بطبيعه مرضها او درجه تطوره غير القليلين جدا فى تلك المرحله احبت شاب (من طرف واحد) كان زميل لها بالجامعه ولم يكن يعرف حقيقه مرضها ولا ان الشحوب الشديد على وجهها هو اثر العلاج الكيماوى فى يوم كانت بتكلمنى وقالت لى عارفه لما بيكلمنى كويس يوم واحنا فى السكشن او يضحك معايا بحس اننا خفيت

ده تعريف الحب فى نظر اسماء 

بنت عندها 19 سنه مريضه سرطان من الدرجه التالته بتاخد علاج كيماوى من عمر 16 سنه متهالكه وزنها 40 كيلو ضحكه حبيبها بيضيع كل ده وتحس انها خفت هو ده الحب هو ده فعلا الحب يشفى من اشد الامراض حتى ولو كان وهم فى خيال فتاه مريضه

الله يرحمك يااسماء

سنه اولى ديمقراطيه

اه والله فعلا سنه اولى ديمقراطيه اول مره احتار اول مره فعلا احس ان صوتى امانه وانه حيفرق وان صندوق  الانتخابات الجميل النزيه اللى طول عمرى بحلم بيه فجأه تحول لكابوس صداع فى دماغى ملازمنى اقول ايه اعمل ايه اه ولا لأ حد يقول ياخوانا واللى زاد وغطا ان الاخوه اعضاء الفيس بوك الكرام والاخوه الصحفيين الاعزاء وكل من هب ودب وفاهم او مش فاهم بيفتى ويشرح ويحاول يقنعك بوجهه نظره وبعد ماتتمقق عينيك قرايه تلاقى نفسك فى حاله من حالتين اما زى مانت ماستفدتش حاجه وتلعن الساعه اللى قريت فيها المقال ده

او لو كاتب المقال او الرأى جامد حبتين يلغبطك اكتر وبرضه تلعن الساعه اللى قريت فيها المقال

ده طبعا غير نظريات المؤامره اللى احنا بقينا غرقانين فيها من يوم25 يناير وبقيت مشكاك فى الكل لدرجه شويه وحأشك فى نفسى واسأل نفسى انا كنت مع مين قبل الثوره

بصراحه محتاااااااااااااااااااااااااره ومعنديش غير كلمه محمد هنيدى فى فيلم جاءنا البيان التالى 

ربناااااااااااااااااااااااا يوووووووووووووووووثتر

الاوله فى الغرام

اه فعلا الاوله فى الغرام الاوله فى الكتابه فى مدونه والاوله فى الكتابه وغيرى يقرا اللى كاتبته احب اعرفكم بس ليه قررت اوجع دماغكم

الحقيقه 

اه اهى كلمه الحقيقه دى توجع وتزنق اوى بصراحه 

الحقيقه انى اتخنقت عاوزه افضفض واحكى وحسيت ان اكيد فى زيى كتير  والحقيقه اكتر بما انه يعنى اليوم العالمى للصراحه انى وحيده واصعب انواع الوحده لما يكون حواليك ناس كتييييير

فقررت انى مش حاكون وحيده تانى  ولا حاسكت تانى وحاكتب واقول ومعلش اسمعونى
                                                                                                        سلام مؤقت